Te Pā Ohoreo

Toi Mai

  • Wellington

Ko Toi Mai, koia ko te Ohu Ahumahi (Workforce Development Council) hou e kawea nei te haepapa o ngā ahumahi o te Auahatanga, o te Ahurea, o te Hākinakina me te Mahi a te rēhia, o te Hangarau Matihiko hoki. Ko tā mātou kaupapa, ko te whakahaumakotanga o ngā mātauranga ā-ahumahi me ngā whakangungutanga kia tutuki pai ai i ngā hiahia o ngā ahumahi. He tōpūtanga hou mātou e kōkiri nei i tō mātou wawata mō te hunga whai mahi o te motu nei, arā, ko te whakatūturutanga o te tukunga mātauranga kia riro pai ai i a rātou ngā pūkenga e tika ana mō te ao mahi o te wā nei, mō te āpōpō rā hoki.

E tūhura ai ngā mōhiohio ki te kawenga o ngā Ohu Ahumahi, pāwhirihia te hononga-i-tua nei, https://www.ohumahi.nz

E kimi ana mātou i tētehi Pā Ohoreo, arā, ko tētehi Mātanga Whakawhitiwhiti Kōrero kia hono mai ki tō mātou ohu whakaihiihi. Ko tā te Pā Ohoreo, ko te tukunga o ngā kōrero me ngā karere ā-roto, ā-waho hoki, ā, hei tukunga auaha, hei tukunga kounga e whai hua ai. Ko ngā momo karere, he karere ā-rongorau, ā-pāhapori hoki, he karere kōkirikiri, he whakawhitiwhitinga kōrero hoki ki a rātou o te hunga whaipānga hei āwhina i te tutukitanga o ngā kaupapa mātua, o ngā wawata hoki. He toronga whārahi tō tēnei tūnga mahi e hāpai ai i ngā mahi whakatō rautaki, i te mātaitanga hunga whaipānga me te tautoko i ngā mahi whakahonohono, anō hoki, ko ngā mahinga pāpaho, ko ngā whakataunga rongorua, ko te whakatau nawe, ā, ko te pāhapori, ko ngā kaupapa whakatairanga, me ngā mahi ā-ipurangi, te whakahaere hautaka hoki.

Hei tūnga takitahi te Pā Ohoreo – Kei a koe te mana ki te waihanga me te whakatinanatanga i ngā mahi nui kia tautokoria ngā kaupapa mātua me ngā wawata o Toi Mai. E hāngai ana ki ngā kaupapa e whai nei (hoi, ehara i te mea ka rāhuitia ngā mahi i ēnei):

  • Kia whai māramatanga ki tā mātou whakaū ki te whakamana i te Tiriti o Waitangi me tōna kitenga i te whārahi o āu mahi
  • Waihangahia, whakaritea, whāngaihia ngā rautaki whakawhitiwhiti kōrero ā-waho, ā-hautaka, ā-pāpaho me ngā nekehanga pāhapori mō Toi Mai
  • Waihangahia, whakahaerehia, whāngaihia ngā rauemi kōrero tōtika hei hāpai i ngā kaupapa, i ngā kōkiritanga hoki me mea kia kounga te tuku
  • Āta aratakina te whakahaeretanga o ngā putanga kōrerorero, ā, kia piritata atu hoki ki te Kāhui Pou (ELT) rātou ko te Poari o Toi Mai
  • Whakatūturutia te hāngaitanga o ngā kōpae whakawhitiwhiti kōrero, ngā nekehanga hunga whaipānga, te mahinga tahitanga hoki hei whakawhiti kōpae hei tukunga ki ētehi atu Ohu Ahumahi – Hei kawenga kōrero ki te whānui o te Ohu Ahumahi, ki ngā Mata Herehere hoki, inā e tika ana kia pēnā.

Ko tā te Pā Ohoreo, ka whāngaihia katoatia āna ratonga ki ngā kaupapa pēnā i ngā mahi waihanga rautaki, i te mātaitanga hunga whaipānga me te tautoko i ngā mahinga whakahonohono.

Ko ētehi o ngā pūkenga e kimi nei mātou, e whai nei:

  • Kia kounga reo whakawhiti kōrero, reo ā-waha, reo ā-tuhi, he pūkenga hoki ki te reo ā-whatu, ā-tinana hoki
  • He pūkenga ki te whakahaere i te taurea o ngā hunga whaipānga, hunga kiritaki rātou ko ngā tōpūtanga pāpaho
  • He pūkenga-rau ki te poipoi hononga kia mahitahi ki te hunga whānui pērā i te hunga whakahaere, ngā kaimahi, te hunga pāpaho ā-waho rātou ko te hunga whai kirimana
  • Mahitahi ki ngā iwi, ki ngā hoa pakihi Māori kia waihangahia tahitia ngā nekehanga, ngā whakamahinga, anō rā, kia whakaaweawe, kia whakahonohono me te whakatō i te kakano kaupapa whakawhiti atu i te whārahi o ngā kawenga.
  • E mārama pū ana, he kawenga mōhiotanga hoki ki ngā atikara o te Tiriti o Waitangi
  • He mōhiotanga ki Te Ao me ngā Mātauranga Māori, otirā ki te hunga o Te Moana-nui-a-Kiwa
  • He whāinga māramatanga, he matatau rānei ki te reo Māori me ōna tikanga (he pūkenga reo Māori ā-tuhi)

He wāhi mahi tō mātou e whakanui ana i te tangata me ngā whanonga o te whakaaro kanorau, o te whakaaro whiringatahi hoki. Nā reira, e kite ana i a mātou nekehanga o ia te rā i a mātou e whakanui ana i te Tiriti o Waitangi, i te kanorau hoki o te motu nei me ngā ahumahi, ngā tāngata e ngana ana mātou ki te tautoko. E whakanui ana, e whakamana ana hoki mātou i ngā mahi a ia kaimahi me te kanorau o ō rātou hekenga, wheakoranga, pūkenga, tirohanga hoki. Ka kaha aro mātou ki ngā tono mai i te hunga nō ngā hapori e aronui ai mai rā anō hei hapori tautoko kore i te wehenga kei raro i tō mātou maru, otirā, ko ngā tono hoki mai i a rātou e taea ai te tirohanga Māori te mau mai ki tā mātou mahi.

Kaua e pāpōuri mai, ahakoa he karanga tēnei ki te katoa, hoi, kia hāngai pai ki ā mātou wawata me ā mātou kaupapa mātua, ka kaha aro mātou ki a ērā o te hunga e manawanui ana ki ngā āhuatanga auaha, ahurea, hākinakina me ngā mahi a te rēhia, ngā mahi hangarau rānei.

Hoi anō, e tika ana, he mea nui ngā pūkenga me ngā wheako mahi, hoi anō, ehara i te mea he nui ake i a koe. Mō te tangata tēnei mahi, nā reira me whai tangata kia tutuki pai ai ngā mahi. Nō reira, ko ngā pūkenga ka rua, ko koe hei tangata me tō katoa ka tahi, mauria mai koe ki tēnei mahi, mauria mai koutou ko tō rahi, ko rātou kua huri atu, ko rātou i āianei, ko rātou hoki e whai ake ā muri, koinā rā tā mātou e kimi ai.

Kei tō mātou tari i Te Whanganui-a-Tara tēnei tūnga mahi e kawe ai.

Tēnā tono mai mā te hononga-i-tua kei raro, ki te hiahia ki tētehi whakamāramatanga tūnga mahi, ki te whakarite i tētehi uiui muna rānei tuku īmēra ki recruitment@wdc.nz. Tūhuratia ngā mōhiohio mō mātou, mō ngā kawenga o te Ohu Mahi hoki, ki https://www.toimai.nz/

Ka kapi te kohinga tono, ā te 5pm, hei te Rātapu 21 o Akuhata 2022.

Kia pai te hauora me te waiora o ā mātou nei kaimahi, e huri ana te Ohu Mahi ki tētehi Kaupapa Here Rongoā Araimate e here nei i te katoa o ā mātou kaimahi kia whai, kia mau hoki i tētehi tohu Rongoā Araimate Kōwheori -19, e mōhiotia whānuitia nei hei My Vaccine Pass (CVC), mā tēnei te haerenga tonutanga o āu mahi e pai ai.

TONO MAI

  • Share this post!