View site in Te Reo

Ko Ngā Tūranga Wātea E Rima

Home
Ko Ngā Tūranga Wātea E Rima

Ko Ngā Tūranga Wātea E Rima


Te Mātāwai

Closing Date : 11 Jun 2018

Kātahi nei te wā mō te whai wāhi atu ki te whakarauora i te reo Māori

E whai wheako ana koe ki ngā mahi rangahau/aromatawai, ki te haumitanga, ki te whakarite rautaki, ki te whakahaere tari rānei?

E kimi ana koe i tētahi huarahi e āwhina ai koe ki te hautū i te whakarauoratanga o te reo Māori? Kei te hiahia whai wāhi mai koe ki tētahi tīma e mahi ngātahi ana ki ētahi mātanga whakarauora i te reo Māori? Ā kāti, he huarahi papai tēnei ki te mahi i roto i tētahi whakahaere hou me tētahi tīma hou. He hinonga motuhake ā-ture hou a Te Mātāwai i whakatūria ki te hautū i te whakarauoratanga o te reo Māori mā ngā iwi me ngāi Māori.

He kōrero mō ngā tūranga hou

•   Kaiwhakahaere Rangahau – ka noho haepapa tēnei tūranga ki te whanaketanga, ki te whakahaerenga me te whakatinanatanga o te rautaki rangahau a Te Mātāwai tae atu ki te aroturukitanga me te aromātaitanga o te hōtaka mahi. Ka riro mā te Kaiwhakahaere Rangahau e whakahaere te Kaitātari Rangahau Matua (kua kopoua).

•   Kaiārahi Rautaki – ko tā tēnei tūranga he tautoko taha rautaki nei i te Kaiārahi Matua ki te ārahi i te anga rautaki a Te Mātāwai, tae atu ki te tautuhi me te tuku whakamāherehere mō ngā huarahi e maea ake ana, mō ngā take kaupapa here me ngā rongoā tērā ka whakaputa mō te whakarauora i te reo Māori. Ka taka mai tēnei tūranga ki raro i te Kaiārahi Matua (kua kopoua).

•   Kaiārahi Haumitanga (e 2-3 ngā tūranga) – he tino tūranga ēnei hei tautoko, hei ārahi anō i te whakatinanatanga o te ara haumitanga. Ka āwhina tēnā me tēnā kaiārahi haumitanga i ngā Kāhui (ngā kāhui ā-iwi, ā-rāngai) ki te whanake me te whakatinana i ā rātou mahere haumitanga. Me tāpae anō he whakamāherehere, he kupu ārahi mō ngā mahi haumi me ngā tukanga. Me huri haere anō hoki ki te tautoko i ngā Kāhui. Ka taka mai ēnei tūranga ki raro i te Kaiwhakahaere Haumitanga (kua kopoua).

•   Kaiwhakahaere Tari – Ko tā te Kaiwhakahaere Tari he whakahaere i ngā mahi o ia rangi a te tari o Te Mātāwai tae atu ki ngā ratonga Kaiāwhina Matua ki te Tumu Whakarae me te tīma kaihautū.

He tūranga ukiuki, he tūranga tūturu ngā tūranga katoa, kei Te Whanga-nui-a-Tara te mahi.

He kōrero mō Te Mātāwai

I whakatūria a Te Mātāwai e te Ture Reo Māori 2016. Kua tuhia te Ture ki te reo Māori me te reo Ingarihi, ko te tuhinga reo Māori e whai mana ana – he tuatahitanga mō te pūnaha ture o Aotearoa. Ko tēnei mea Te Mātāwai ko te pūtakenga ake o tētahi rerenga wai. I te horopaki o te whakarauoratanga o te reo Māori, he whakatinanatanga a Te Mātāwai i ngā wai hou e pupū ake ana i te puna, ngā wai tuku

oranga kia matomato ai te tupu o te reo Māori hei taonga mō Aotearoa. Nō nā tata tonu nei i whakamanahia ai e Te Mātāwai te Rautaki Maihi Māori. Ko te whakakitenga o te Rautaki Maihi Māori ko te whai kia ūkaipō anō te reo – kia whakahaumanutia te reo Māori hei reo ūkaipō.

E toru ngā kawenga matua a Te Mātāwai:

  • Te Mātāuru – te tuku haumitanga ki ngā kaupapa reo Māori ($10.8 miriona i te 2017/18). 

  • Te Mātātupu – te tuku haumitanga mō te mahi rangahau ($1 miriona i te tau). 

  • Te Matatū – te pūtea whakahaere i te tari me Poari (e $3 miriona i te tau). 


Ko ētahi atu mahi a Te Mātāwai ko te: 


  • Tuku whakamāherehere ki te Karauna mō te whanaketanga o te Rautaki Maihi Karauna. 

  • Kopou tāngata ki Te Aratuku Whakaata Irirangi Māori, ki Te Māngai Pāho me Te Taura Whiri i Te Reo 
Māori. 

  • Hautū tahi i Te Aratuku Whakaata Irirangi Māori ki te Minita Whanaketanga Māori me te Minita 
Tahua. 


I whakamanahia te Ānga Kāhui e te Poari o Te Mātāwai i te Hōngongoi 2018, kei tōna pūtake ko te ārahi i ngā iwi, i ngā rohe me ngā hapori ki te whakarauora i te reo Māori. Ko tā ngā Kāhui he whakapāpā haere ki ngā akunga e mahi ana ki te whakatakoto mahere, me te whakatau anō i ngā haumitanga o te rohe me ngā rāngai reo. 


Mō tētahi kape o ngā kōrero whāiti mō ngā tūranga (tae atu ki ngā tohu utu) whakapā mai koa ki a natasha.kuka@tematawai.maori.nz. Ka kati ngā tono ā te 9 i te ata o te Rāhina, te 11 o Pipiri 2018. Ka whakaritea ngā uiuinga mō te 18 o Pipiri 2018 haere ake.

 

Copyright Taea Ltd 2013.